الامتحان خدعة

للى فى كلية فاهم انا بقول ايه , دخول الامتحان مبقاش زى الاول قياس لمدى استيعابك لمقرر ما اطلاقا الباتة , الامتحان خدعة بكل المعايير وعاوز مخطط استراتيجى شاطر عشان يقدر يعدى بافضل النتائج .. ازاى تقدر تفهم الدكتور وتقرا دماغه من المحاضرات وتحس بقرون استشعارك هو حيجيب الحتة دى ولا لا .. ازاى تقرا الامتحانات للى قبل كده وتشوف شكل فورمة الامتحان فى دماغه .. ياترى الدكتور ده من الاستايل للى بيجيبه فى الميدتيرم مش بيجيبه فى الفاينل ولا عنده احمد زى الحج احمد .. بيحب النظرى واللك ولا بيجيب من الاخر .. مسائله من الشيت بالنص ولا بيبتكر وحاجات كتير لو قلتها ححتاج عدد اسبوعى .

بس مش انتا بس للى بتخطط كمان الدكاترة بتخطط وبتككتك يقولك انا المهم عندى انك تفهم وحقولك الامتحان حيجى فى ايه وميجبش حاجة من الكلام للى قال انه حيجى اطلاقا , واحد تانى يسيبه من المنهج كله ويجيبلك من اخر محاضرة كل الامتحان , واحد تالت يضحك عليك وميدكش القوانين للى المفروض بيحطهالك فى الورقة او لو جابها يجبها بعد لما يعملها عملية فتيج وتلاقيها قلبت حاجة تانية ونتا وشطارتك.

من الاخر الامتحان معركة بينك وبين الدكتور كل الادوات متاحة ( تكتب فى التايبلز بتاعتك , تكتب على الالات الحاسبة , تسيب ورقة فى الحمام ) , خلاص ان الامتحان كان تقييم بقت موضة قديمة , دلوقتى الامتحان للاقوى